ألف:

أولف من عذيات الأمثال === والقلب من شد العنا يجول اجوال

علىغزال لي طرى لي على البال === اهتز عرس القلب له عقب فرقاه

الباء:

بعد شفت الحبيّب وقفا === أقفى بقلبي طفل ريم معفا

صدفة نهب عقلي وعنى تخفا === جدد صوابٍ في الحشا يصعب دواه

التاء:

تجدد بي جروح خطيره === وانا بديره والحبيب بديره

عزي لمن مثلى حباله قصيره === رماه في بحر المحبة وخلاه

الثاء:

ثبت حبه بليا محاصيل === يلعب بي الهوجاس لعب المهابيل

والحيل حيل الله ولا في يدي حيل === راع الهوا يصبر على كل ما جاه

الجيم:

جر الصدر تسعين ونّه === منها معاليق الحشاجر قنّه

ياويل من بيض المها يذبحنه === ذبح بدون سلاح تمضي سطاياه

الحاء:

حياتي في خطر من هوى الزين === غرو لمحته واشغل القلب والعين

والزين فتنة من عذاب المشقين === كم واحدٍ فبلى هوى الزين عنّاه

الخاء:

خفيف الدم حلو الجمال=== يفز قلبي لو يجي له مجال

ياحيلة الله فرقتنا الليالي === طيفه على بالي ولا يمكن أنساه

الدال:

دولاب الهوى فر باسى === وانا قوى الباس والراس قاسي

نجل العيون يطوعن كل عاسي === قبلي وعقبي من هوى البيض شقاة

الذال:

ذاب الحال ذاك الوليفِ === الجادل اللي بالمحبة شريف

غزو بجيل اليوم ماله وصيف === سبحان رب كمله يوم سواه

الراء :

رماني بالعيون المظاليل === والعنق عنق اللي يرب المساييل

والصدر فيه اثنين مثل الفناجيل === أو بيض قمري وأشقر الراس غطاه

الزاء :

زريف الطول والزين كله === ولا طغى بالزين جعله فداً له

في حجر بيته ماتعدى محله === واللي يصون الزين ياجعله فداه

السين:

سلم يوم قلت السلاما === ثم اختفى عنى وهو له مراما

يخاف من هرج العدا والملاما === والله يلوم اللي يلومه من عداه

الشين:

شفى شربة من عذابه === ياليت من حاش الغضي والتوى به

يوم الحبيب واقف عند بابه === ياليتني في داخل البيت واياه

الصاد:

صادفته وانا جاهل فيه === مانيب اعرفه ياهل العرف واسميه

لاشك جرح الحب يمضي براعيه === واللي يعرف الحب ما هوب يخفاه

الضاد:

ضدي شوف من لا عرفته === اللي تهيا لي بدربي وشفته

ما لي نوايا ليتني ما صدفته === عرف بليا ولف راعيه ما ابغاه

الطاء:

طويل العنق مكحول الاعيان === ما فيه مثله في المها دون حقرن

عندي وانا عيني مرآتي وميزان === من كان له راي مع الناس كفاه

الظاء:

ظحى الجمعة ضربني بالأهداف === واشعل بقلبي نار منبوز الارداف

بالواصف ماله وصف مبروم الاطراف === الاغزال كاملات حلاياه

العين:

عينه كن فيها سرابا === لي سلهمت منها سهوم المنايا

تذبح بدون سلاح منها الهوايا === تمضي على قلب المهاوي هواياه

الغين:

غطروف تغطرف غصونه === ريان عود ويقصر الوصف دونه

نقى عرص ومذهبه ما يخونه === عفيف جيب والنقا من سجاياه

الفاء:

فلو إن التمنى يفيدِ ... === كان اتمنى مثل ضي الفريد

لا شك مضمون التمنى بعيد === ما في التمنى فايده واتمناه

القاف:

قلبي من المعاليق ذابي ... === رماني المجمول ما اخطا صوابي

هذا نصيبي منه لا واعذابي=== لو ان حظي جاد ساعد بجمعاه

الكاف:

كيفي خاب والحض خايب ... === حضي يعرضنى كبار المصايب

واكبر مصيبة شوف بعض الحبايب === اللي بغى قتلى سها عن مغطاة

اللام:

لوعات الحبايب فجيعه === تفتح جروح بالظماير وسيعه

والعشق له عادات مثل الطبيعة === والطبع مع راعيه لو شاب يبراه

الميم:

ما يكتب على المرء يجري... === تجرى به الاسباب ما هوب يدري

مسكين راع الحب هواه يسرى === ليله سهر ويجدد الصبح مسراه

النون:

نوم اللي تولع توايح === والي مشى ما يفتهم وين رايح؟

دايم وهاجوسه مع الزين سامح === راع الهوى بين بحاله وممشاه

الواو:

واجد من شكا من غرامه === ولا وجد غير الشقا والندامة

ما واحد حصل غرام وسلامه === لا بد كاسه لي صفا يصتفو ماه

الهاء:

هوى الخلان ما هو يدوم === سمي هوى يدور في كل يوم

راعيه تلعب به كثير الهمومَ === وآخر جدا يصفق شماله بيمناه

الياء:

يليق إن الهوى سم ساعه === ولا يفيد بها طبيب الاشاعة

والله يقطع من نوى بالقطاعة === لا عاد حب يوم هذى سواياه

لام ألف:

بالاعاد شوف الهنوف === لي صار ما لي غير فرك الكفوف

أقفى وخلاني وعيني تشوف === واللي مقفي ماب عيني ترجاه

الألف تم وكل ما قلت مفهوم === والعشق صدفة بين الاحباب مقسوم

ما كتب للمخلوق يجيه ملزوم === من خير والاشر لا بد يلقاه

محسن وابن لعبون وايضا العطاوي === وابن عفالج كان ما ينب غاوي

وابن عميرة للغنادير هاوي === كل يحب الزين لو بس يراه

وابن سبيل شاعر الغزل وجدان === يفز قلبه كل ما شاف غزلان

مع ناس واجد مثلهم صرت غرقان === في بحر حب اللي صدفته مفاجاه

وصلاة ربي عد ما ابهل سحابه === واعداد من في البيت طاف وسعى به

على احمد المختار سيد الصحابه === الهاشمي من نسل عدنان مجناه