بناءاً على طلب الزوار: قريباً قسم الصوتيات والمزيد من الغزليات

 منتديات الحريق  |  بوابة الحريق

خذت القلم وسطر أوراق ودواه === باعبر ابيات يبين معناها

من خاطر مشتاق للشعر يهواه === من صدرى القيفان ذعذع هواها

بحر الشعر في ضامري يصطفق ماه === وليجا لزوم للسوالف رواها

يالله يا المعبود يالله يالله === يامكون الاكوان بارض وسماها

مابين كاف ونون ما اراد سواه === سبحان رب كل حاجة قضاها

رب كريم كل خلقه ترجاه === أجيال بعد أجيال بالله رجاها

الله يوفقنا لما كان يرضاه === ويدلنا لاحكامه اللي رضاها

ندعوه باسماه الكريمة ومناه === جزل العطايا مايمن بعطاها

يرحم زعيم مهد المجد واحياه === صقر الجزيرة ليثها اللي حماها

عبدالعزيز اللي نقل داه لعداه === وبلاد جده من عداها خذاها

واشرق بها نور بالمجد ضواه === واستبشرت بالليث من يوم جاها

بالسيف والهمة بنا المجد واعلاه === ساد الجزيرة يوم ربي عطاها

أسس قواعدها وبالحق مجراه === والكلمة العليا نمسك عراها

بني الحجاز ونجد والنصر يبراه === حتى صفت له واذعنت له عداها

خمسين عام أسس الملك وارساه === وهو بنفسه عن بلاده فداها

شرق وشمال وغرب وجنوب عفاه === جزيرتنا وصفا غثاها

ومعه رجال في المهمات وياه === رهن الاشاره تستمع لي نخاها

على العهد وافين بالوجه والجاه === من يعرف امجاد الوفاء ما شناها

حب الوطن في ثومة القلب ومناه === وهي الجزيرة تكرم اللي لفاها

دار العدالة والنصف والمساواه === زرع المكارم في نواحي نداها

يوم الفقر والخوف حنا سكناه === واليوم أمان وخير ربي عطاها

والفخر للي في البلد ما تعداه === عدت ملايين بذلها فداها

مرحوم أبو تركي عسا الله يجزاه === بالجنة الخضراء يقطف جناها

سلم مقاليد الزعامة الي ابناه === زعامة بالحق يضفي ذراها

على الوطن كله من ادناه واقصاه === في راية الاسلام بعشق سناها

ما مات من خلف حلاحيل شرواه === مثله ملوك في دروب مشاها

واصل مسيرتها سعود ومزاياها === تابع دروب الحق في مبتداها

والفيصل اللي شيد المجد واحياه === بالنهضة اللي وسع الله مداها

تضامن الاسلام نادى وسواه === والمسلمين الله يحقق رجاها

فيصل وابوفيصل واخو فيصل الله === يجزا ملوك ما لحقنا جزاها

يسكنهم الجنة بلطفه وحسناه === والخلق لا بد الفنا منتهاها

اسلافنا بالمجد والعز شفناه === وافعالهم تاريخنا ما نساها

واليوم خالد مثلهم في سجاياه === خلف السلف درع الجزيرة كساها

ثوب الشرف والعز من طيب مجناه === قائد مسيرتنا رفع مستواها

عسى صواديف المنايا تعداه === ملك الجزيرة بالعدالة رعاها

وفهد ولي العهد لى حل طرياه === يرهق عداه ويفهم الى وراها

عضيد خالد كل الاسلام ينخاه === لصعبت القالات حلل خطاها

والنايب الثاني عبدالله عرفناه === بافعاله وكل الدول ما خفاها

زيدو منا ليجا نها المثاراه === مشا بقوات تحطم عداها

وسلطان في كل المهمات نلقاه === صقر الدفاع الى صقور مناها

روع الخطا واللي يتحدا تنحداه === بالله ثم اسود ما حد سواها

الأسرة آل سعود بالخير معطاه === مورد ومصدر حق في مقتضاها

والشعب ينهض بأمر دينه ودنياه === لصامد العدوان طنب رغاها

زرع الثنا اللي بعدنا زرعناه === وامجادنا يفخر بها اللي بداها

في مملكتنا مهبط الوحي وهداه === واليوم كعذرى تجدد صباها

غطرف رهرها والعماير مبناه === فيها المدارس نشكر اللي بناها

فيها المصانع ماطلبنا وجدناه === ومخفض لأبناء الوطن مشتراها

لو بنعد اللي بها ما حصيناه === من كل مشروع جديد زهاها

يادار يا دار السعد زان ملفاه === ان زارها ما عاد حب بعداها

كل يعبر من ضمير ويقراه === والناس تسمع ما عاد حب بعداها

واللي على بالي معاني منقاه === فيها تراحيب ضميرى نقاها

يا مرحبا واهلا وسهلا مثناه === ترحيبة بلاد بضيف نصاها

وهي الوسيطا بالحريق المسماه === ورجالها للضيف ترفع نداها

ضيف لنا واخو لنا ما جهلناه === فزنا بغازى في البلد يوم جاها

جانا القصيبي في بلدنا وحياه === وادى الفرع واللي سكن في نراها

وزير صنع الكهرباء من تولاه === طور مشاريعه وزود غذاها

فتح مصانع للوطن في نحاياه === نور القرايا والمدن في سماها

والشكر لله والفضل ما جحدناه === لحكومة ما قصرت في عطاها

للشعب كله وين ما كان ترعاه === ترعا مصالحنا وربي رعاها

كم انجزت من كل مشروع نلقاه === ذخر لنا بالمملكة من غلاها

واليوم مشروع الحريق افتتحناه === عشر مكاين كهرباء الي شراها

الشيخ بن جدوع لوما مدحناه === تشهد له افعال المكارم حواها

شهم كريم تبذل الجود يمناه === مع طاعة الله بالتواضع حضاها

نور بلدنا كلها لاعدمناه === مع المفيجر و نعام واللى وراها

الحوطة وحنا سوا بالمساواه === وهي بلدنا الثانية من وفاها

الكهرباء لو جاء طلبهم شبكناه === لرجال في دار عزيز نباها

مشروع ضخم وحفلنا الى قصدناه === افراح بالزوار في ملتقاها

حفل الشرف رحب بمن جاه وغلاه === وان جا قواصر بالمواجب رفاها

وصلاة ربي عد وبل نثر ماه === على النبي وختامها منتهاها