بناءاً على طلب الزوار: قريباً قسم الصوتيات والمزيد من الغزليات

 منتديات الحريق  |  بوابة الحريق

يا ابن شنار الحظ قلت وفوقه === ادرجه من حول عام الى عام

مثل البعير اللي يبي من يسوقه  === مع صخف حاله صايبه هزل وهيام

واشوف رجله ذا الليالي تعوقه === ولايقوم الا على كف وابهام

وانا بجهدي منصح في حقوقه === أدرس عليه ادروس وتعود أحلام

غدا كما ثوب تزايد فتوقه === من خلف لي خطناه ينهد قدام

والى وعدني ما صدق فيه بوقه === ومع طول صبي صاب صدري تهشام

وعيني سواهيج الكرى ما تذوقه === متحير ما بين عاذل ولوام

أحد يقول: إفصد مجامع عروقه === كوده يثور وينقل الحمل لي قام

واحد يقول: بعه ولو طاح سوقه === وليا تخاف إن بعت ياتيك غرام

واحد يقول: اردم من الحجر فوقه === ليما يموت وخيره العمر الاعدام

وشى المناسب يوم يتخص طروقه === الفصد والا البيع والا نقرة الشام

يعل طير ما تشيله سبوقه === يصرم جناحه يا هل العرف صرّام

****************

تم الجواب وطعمة الزاد ذوقه === ياهل الحمايا باصروني ها الأيام

وصلوا عدد وبل تشاعل بروقه === على نبي وضح شروط الاسلام

ثانياً: رد الشاعر ناصر بن شنار على ابن لذيذ فقال:

يالله يا مطلق عن العبد عوقه  === يا مدبر ملكه بتصريف الأيام

تبرج لمن قلبه تزايد خفوقه === هاتوب لي حبر وقرطاس واقلام

أكتب جواب للمساجل يشوقه === الشاعر اللي حط في القلب مرسام

فيصل شكا حزه وكثر طقوقه === والحظ طوع مايبقى سوق وخطام

يا ابو لذيذ الحظ رفيت شقوقه === لا تجحد النعمة ترى الله علام

حظك كما نوٍ تزايد حقوقه === ما احد سواتك حط بيتين وخيام

بيت جديد عارف وين سوقه === والبيت الآخر ساكن به من العام

اشكر وليك خل نفسك صدوقه === يا ويل راع الظلم من طاح ما قام

مرٍ تعقرب له ومرٍ تعوقه === عندي عليك شهود مرزوق وحزام

تخاف من عين حسودٍ زهوقه === إحذر تطاوع كل حاسد ونمام

وان كان نفسك بالدناعة تبوقه === فبرايل الله مفطر الناس ما صام

دبلت رواتبكم وطالع نطوقه === آقف بحدك حظك اليوم ما نام

ما في عيونه وحدة محروقة === يقرأ ويكتب دارس كل الأرقام

من شال حمل الظيم طاح معلوقة === قبلك وعقبك شايل الظيم ينظام

قدمت لك شورى بنفسٍ لبوقه === وطقيت عن شورى كماطقة دهام