بناءاً على طلب الزوار: قريباً قسم الصوتيات والمزيد من الغزليات

 منتديات الحريق  |  بوابة الحريق

سلام والملعب يبي حرب ودفاع === والمعبة مجلوبة للي يسوم

لا شك حنا ما نبي درب النزاع === عطني علومك واستمع رد العلوم

قال أحمد:

يامرحبا والسر يحفظ مايذاع === ترحيبة يوضى سناها كل يوم

اللي مشى لي شبر بمشي له ذراع === ذا سلمنا ياللي تعرفون السلوم

قال ناصر:

يا ويسن سلطانٍ خلقه الله شجاع === كل الملا تحتاج له وقت اللزوم

شيخ كبير حاكم وأمره مطاع === باسه قوي لي عطى درب عزوم

قال أحمد:

لولا العمود إن كان ما قام الشراع === وطير بلا جناح ما يقدر يحوم

اللغز بيبانه على الشاعر وساع === ويفصل المعنى تفاصيل الهدوم

قال ناصر:

ماهوب لا يشرى ولا يجلب يباع === قد قلت لك حكمه على العالم عموم

اللغز حله دامنا بالاجتماع === لعل حظك مع هل الحفل يقوم

قال أحمد:

الحل مني وانت منك الاستماع === والله لحله لو توديه النجوم

لغزك تراه النوم ماعنه امتناع === يحكم على ابن آدم ولاهوب محكوم